Կազմակերպությունը նպատակային շուկան ընտրելուց հետո որոշում է, թե ինչ դիրք է զբաղեցնելու շուկայում: Անհրաժեշտ է ուսումնասիրել մրցակիցներին, նրանց թույլ և ուժեղ կողմերը բացահայտելու համար: Մրցակիցներին ուսումնասիրելիս պետք է նրանց խմբավորել.
- Հավանական մրցակիցներ, որոնք կարող են մատուցել տվյալ ծառայությունը,
- Մրցակիցներ, որոնք վարում են ծառայության մարքեթինգի նույն ռազմավարությունը,
- Անմիջական մրցակիցներ, ովքեր նմանատիպ ծառայություն են մատուցում և ունեն բարձր աճի ցուցանիշներ:
Մրցակիցներին ուսումնասիրելիս պետք է հաշվի առնել նրանց փաստացի և որակական ցուցանիշները:
Քանակական ցուցանիշների վերլուծությունը ենթադրում է հետևյալ հարցերի պատասխանները.
- Զբոսաշրջության ոլորտում ո՞ր ընկերություններն են մրցակիցներ
- Ինչպիսի՞ ծառայության տեսակներ են մատուցում մրցակիցները
- ո՞վ է հիմնական մրցակիցը
- ինչպե՞ս են նրանք առաջ մղում իրենց ծառայությունները
- ինչպիսի՞ գնային քաղաքականություն են վարում
- ինչպիսի՞ այլ ցուցանիշներ են ազդում մրցակիցների գործունեության վրա
Որակական ցուցանիշների վերլուծությունը ենթադրում է հետևյալների վերլուծությունը՝
- Կազմակերպության համբավը
- անձնակազմի որակավորումը
- սպառողների հակվածությունը
- կառավարման համակարգը
- գործունեության ռազմավարությունը շուկայում
Իհարկե, շատ բարդ է տեղեկություններ հավաքել մրցակիցների մասին, այն էլ՝ մանրամասն: Բայց, ի տարբերություն ապրանքային շուկայի, ծառայությունների շուկան տարածքային իմաստով ավելի խտացված է, որն էլ հեշտացնում է խնդիրը:
Հիմնական մրցակցային առավելություններն են.
- Հայտնի անունը
- անձնակազմի որակավորումը
- ծառայության որակը
- անհատական կապը հաճախորդների հետ
- կողմնորոշումը սպառողների նկատմամբ, նրանց պահանջարկը
- արդյունավետ գովազդը
- մասնաճյուղերի զարգացած ցանցը
- նյութական բազան
- լրացուցիչ ծառայությունների համալիրը